هتعمل اي لو انت في الجامعة ولسة معملتش البحث بتاعك لحد دلوقت.

 "كل" الجامعات المصرية عندها القدرة التقنية على كشف السرقة الأدبية في الأبحاث العلمية لأنها مشتركة في أقوى برامج كشف السرقة الأدبية في العالم .. يعني هتعرف بكل سهولة إذا كنت عامل البحث بنفسك ولا لا .. وإذا كنت سارقه هتتقفش وتعرف أنت جايبه منين كمان.
وبناء عليه .. حددت بعض الجامعات نسبة اقتباس مسموح بها في الأبحاث .. بعض الجامعات قررت تلك النسبة 20% .. فلما يدخل البحث بتاعك على البرنامج (لو الجامعة عملت كده) .. هيفحص البحث ويقولك أنت واخد كلام كوبي وبيست بنسبة كام في البحث .. حتى لو كنت كاتب المصدر.
فعشان كده يفضل أنك تفهم الفقرة اللي عاوز تقتبسها كويس جدا .. وتكتبها بأسلوبك .. وتكتب المرجع برضو في المراجع .. وده اسمه Paraphrasing.
المهم .. عشان أنت مضغوط ..  ومفيش قدامك وقت كبير .. وعشان أنا حاسس بيك .. النهارده جايبلك أداة مجانية تعمل بتقنية الذكاء الاصطناعي عشان تعمل إعادة صياغة لأي فقرة أنت عاوزها .. لكن راعي وأنت بتنقلها للبحث بتاعك تراجعها كويس بحيث تكون متوافقة مع ستايل الكتابة الخاص بالبحث بتاعك ومايكونش جمل شاذة مالهاش علاقة ببعض.
رابط الأداة العظيمة دي: https://quillbot.com/
بكل بساطة هتدخلها الفقرة اللي أنت عاوز تعملها إعادة صياغة .. هتعمل إعادة الصياغة في ثواني .. عاملة زي ترجمة جوجل بالضبط .. مفيش أسهل من كده.
دة كل حاجة دلوقت ولو في جديد هجيبهولكم. وتابعوا معايا.
ولو حد احتاج حاجة يا ريت تقولولي.
وكمان خد المفاجئة دي.
خلينا نعترف أن في طلبة ماعندهاش لاب أو كمبيوتر يعملوا عليه الأبحاث في مصر .. وعشان يوصلوا للاب في محيطهم هيروحوا لواحد صاحبهم أو سيبر أو مكتبة .. وبالتالي نزود الاحتكاك وفرصة انتشار الفيروس .. اللي الامتحانات أصلا اتلغت بسببه.
فلما - للأسف - بعض الدكاترة والجامعات .. اللي ماعندهمش وعي تقني .. كل شوية ينزلوا للطلاب بفزاعة ماحدش يعمل البحث عالموبايل .. البحث هيترفض .. يبقى عندنا مشكلة!
دلوقتي هقولك إزاي تعمل البحث على أبلكيشن Google Docs الموجود على كل موبايل  بحيث أن الكلية نفسها ماتعرفش أنك عامله على موبايل.
وأنت فاتح صفحة الكتابة وبتكتب في البحث عادي .. هتلاقي ٣ نقط فوق بعض أقصى اليمين .. هتضغط عليهم وتفتح print layout وتحولها للون الأزرق زي ماهو موجود في الصورة .. وتشتغل عالبحث بتاعك عادي .. كده البحث هيفضل بنفس التنسيق لو اتفتح على اللاب.
بعد ماتخلص البحث بتاعك هتختار من نفس القائمة Share & Export .. وبعدها تضغط على Save as ..  وتختار PDF .. وتبعته للجامعة علطول.
اعملوا البحث عالموبايل عادي .. وشير ومنشن أصحابكم وشجعوهم يعملوه.